للش ده بیرین قینقیرتدی
پنجشنبه, ۹ شهریور ۱۳۹۶، ۱۱:۳۵ ق.ظ
بیر گون بیر شاه عسگرلرینه امر ائله ییر: هر کیم بیر دوشمانین باشین کسیب گتیرسه اونا او باش آغیرلیغیندا قیزیل وئریلسین. باجاریقلی ساواشچیلار هر بیری بیر باش گتیریرلر. بیر نئچه گون سونرا گؤرورلر بیر ال آیاقسیز عسگر باشسیز بیر جمدگی چوخ زحمتله گتیریر. عسگر باشسیز جمدگی گتیریب شاهین اؤنونه قویوب سونرا سایغی گؤستریب و سؤیله ییر: قبله عالم ساغ اولسون للش ده بیرین قینقیرتدی!
شاه اوندان سوروشور: بس بونون باشی هاردادی؟
عسگر دئییر: قبله عالم ساغ اولسون اونون باشی اولسایدی اوندا او منی قینقیرداردی، باشی یوخ ایدی، من اونو قینقیرتدیم!
« قینقیرتماق» سؤزجوگون بوغدا قینی قیرتماقدان آلینمیش بیلیرلر.
دئییشلره گؤره، اسکی چاغلاردا خانلار بوغدا زمی سین بیچمگه ایجازه وئرمزدیلر ویا چوخ بهره آلاردیلار. خانین گیزیرلری هرگون بوغدا زمیلرینه باش وورادیلار. اکینچی لرده گئجه لر گئدیب بوغدالارین قینلارین قیرتاردیلار. خانین آداملاری گلیب زمی یه باش ووراندا اونو آیاق اوسته گؤرردیلر آنجاق بیلمزدیلر کی قینلاری قیرتیلیب. بونا گؤره بو ایشین آدی «قینقیرتماق» قالمیشدی.
للش: بیر سؤزجوک دیر کی چاخان سؤیله ین آداملار اؤزلرینه اشاره ائدرکن سؤیله ییرلر.
میثال: _ کیم بو آغیر داشی بورا گتیریب؟
_ للش گتیریب!
للش بوردا یانی«من، اینجانب»
للش سؤزجوگونده« منم منم لیک واردیر.
یازار: ع. دهقانی
