«قلم» سؤزجوگو
قلمqələm
قلم سؤزجوگو ایله ایلگیلی رحمتلیک دهخدا ایکی اوچ صفحه یازی یازیب آنجاق بونجا یازی «قلم» سؤزجوگونون فارسجا یا عربجه اولماغین گؤسترمه ییبدیر. بیلمیرم دهخدا بیر تورک اولاراق ندن بیر اینه اوجو قدر شک ائله مه ییبدیر کی بو سؤزجوک نییه بیر تورکجه سؤزجوک اولا بیلمز؟
«قلم» سؤزجوگونون «قرم» garam, qərəm سؤزوندن و اونون سونوجوندا «قیریم» سؤزوندن آلیندیغین چوخ یازیلار قبول ائله میشدیر.
بوندان علاوه تورک دیلینده «ل» و«ر» سسی چوخ یئرده بیر بیرینین یئرینه کئچیرلر. من « دولما» سؤزجوگون «دورما» شکلینده تلفظ ائدنلری گؤرموشم. اوشاقلار ایلک دیل آچیب دانیشاندا چوخ سؤزجوکلرده «ر» یئرینه «ل» دئییرلر.
اؤرنگ اوچون:« گل بورا» یئرینه« گل بولا» دئییرلر.
قلم سؤزجوگو تورکجه ده:
_قلمه آغاجینا نییه قلمه دئییرلر؟:
چونکو قلمه نی اکن زامان اونو قلم ائله ییرلر یانی قلمه آغاجینین قول بوداغیندان«قیریب» و یئنی بیر قلمه آغاجی اکیرلر.
_اوت و یا قمیشی بیچندن سونرا یئرده قالان اوچ دورت بارماق اؤزونلوغوندا باشی کسیک و یا «قیریلمیش» قمیشلره «قلم» دئییرلر.
_یازماق اوچون ایشله نن«قلم» قیریلمیش قمیشلردن دوزه لیر.
_هامیسندان آچیق و آیدین آنلام «قلم» سؤزجوگونون «قیریلماق» آنلامیندا ایشلنیلمه سی دیر.
میثال: حضرت عباس (ع)ین قوللاری کربلا چؤلونده قلم اولدو.
بو سؤزجوگون بیر تورکجه سؤزجوک اولماسی آپ آچیق آیدین دیر.
