باریش

گل اوتور بیر چای ایچه ک سنله سؤزوم وار سن دانیش من ائشیدیم باللی دوداقینده گؤزوم وار

گل اوتور بیر چای ایچه ک سنله سؤزوم وار سن دانیش من ائشیدیم باللی دوداقینده گؤزوم وار

پیوندها

۲۴ مطلب با موضوع «تورکی شعیرلریم» ثبت شده است


خبر یوخدور او دونیادان

بیزه بیر سؤز دئین یوخدو

چوخ ایستردیم  گلن اولسون

منه بیر سؤز دئیه ن اولسون

آمما حاییف بو دونیادن

گئدنلردن گلن یوخدو..

الا ای گور قازان!

بیر عؤمر قازدین گور،

بویور ایندی سنه بیر گور

اوزان یات قبریده راحت

ایچینده یوخدو اود یا کؤز

نه جننت دیر نه ده دوزخ

نه بیر باغچا نه بیر گول وار

نه بیر یورقان نه بیر یاسدیق

دویونجا قوملا توپراق وار

قاریشما اونلارا هرگز!

منه بیر سؤز دئ عقبی دن

نه لر اولموش نه لر کئچمیش؟

کیمی جننتده سئیر ایلیر؟

کیمی نار جهننمده؟

یانیب کول تک قارا اولموش

سیچانلار بیر دلیک آچمیش

دئمه سس گلمیری بوردان

اگر اهلی جهننمسن 

داخی قورخما سسین قوزا

اگر نکیر ویا مونکر سنی قورخوتسا هئچ سوسما!

دئ بوردا نه ائله مک لازیم،

جهننمدن اوزاق اولماق

یئریم بوستان و باغ اولسون

یقین چوخ خوشدی بو جننت

یقین یوخدور جهننم هئچ

گئدن گلمیر

اگر بیر یئر پیس اولسایدی گئدنلر اوردا قالمازدی

دئییرلر چوخ گؤزل یئردیر

ملک وار حور و غیلمان وار

نه حوری لر! میثالی یوخدو دونیاده

اؤلوم یوخ، آیریلیق یوخ

هرنه سئوسن اوردا حاضیردی!

گون اورتا یوخ،سحریوخ،

آخشام اوستو یوخ

تلسمک یوخ،

عومور قورتارماییر

چون چاغ آدیندا بیر کلام اولماز

یورولماقدان نیشان یوخ هر نه وار شنلیک،یئمک ایشمک

باهالیق وئرگی یوخ مامور و دولت یوخ

اوغورلوق یوخ

ریا یوخ،توپ توفک یوخ

نه آج واردیر نه ده اؤکسوز

قوجا  یوخدور، قوجالار پهلوان تک بیر جاوان اولموش

نه یوخسول وار کی اوردا هامی اعیان دیر

هرکس آزاد اگلشیب اؤز کاخ وقصرینده شهنشه تک

یئنه من قورخورام تورکون دیلینده بیر مثل واردیر

دئییرلر «آج تویوق یاتسا

گئجه رویاده دادلی داری صرف ائیلر»
۲۰ نظر موافقین ۰ مخالفین ۰ ۳۱ تیر ۹۴ ، ۱۸:۰۰
باریش

من ازیلمک ایسته میرم

آدی قارداش مین باشا داش

آرخایین اولاندا سنه

آرخادان ویرما بئلیمه

بیر ائلین ائولادی گرک

ائلین یولوندا چالیشا

مندن ایستمه کی سوسام

درد آغیردی چکنمیرم

یوکو آتیب قاچانمیرام

دیزلریم بوکولمکده دیر

الین اوزالت الیمی توت

بو  شله دن  سنده پای آل

بو یولو گئدک ایکیمیز

بوکولمز اوندا بئلیمیز

بیر بیریمیزدن گوج آلاق

ائل دردینی درمان ائدک

اوندان سورا دئیه ک گولک

ایندی گولوم نه گونومه؟

قان سوزولن یارالارا

باخیب گولمک اولورمو هئچ؟

بو توتولموش دیلیمله آخ!

سؤز دانیشماق اولورمو هئچ؟

 

 

۲۸ نظر موافقین ۲ مخالفین ۰ ۰۳ خرداد ۹۴ ، ۰۱:۰۶
باریش

وطنین سئومه ین اینسان ندن اینسان ساییلیر؟

امه گین زای ائدن ائولاد قوجاغیندا باییلیر!

او دیل آغزیندا وطندن یارانیب وئرمه یادا

وطن ائولادینه باخ گؤرکی یاتانلار آییلیر

ناخلف ائولاد اولوب دانما اونون وارلیغینی

وارلیغین ساخلایان اؤلکه اولوس ایچره ساییلیر

وطن ائولاد دوغوروب سن اونو اوندان آلیسان!

کیمی گؤردون ایینیندن کسه اعضا پاییلیر؟

من بو احواله باخیب دینمه ین اینسان دگیلم

وطن ائولادینه باخ گؤر نئجه یارا ساریییر

نازلی تورکون دیلینه باخ نئجه حئیراندی (باریش)

شهریارین دیلی دیر اؤلکه لر ایچره یاییلیر

۵ نظر موافقین ۰ مخالفین ۰ ۰۷ ارديبهشت ۹۴ ، ۱۹:۱۴
باریش

بیر گئجه من،

اولدوزلارا باخاندا

سئودیم سنی آی گؤیده کی اولدوزوم!

پارلاقلارین ان پارلاغی

سن ایدین

قارانلیغی ایشیقلادان،

سن ایدین

او گوندندی من،

گئجه لر یاتمارام.

باخیشیمی،

 سندن بیر آن آلمارام.

دیلیم،آغزیم

سندن دئییر هرزامان.

بو گون قارا بولودلاری گؤرنده

اورگیمده اؤزله دیگیم

سن ایدین.

آرامیزدا دورماسینلار بولودلار

قارا بولودلار دولو یاغدیرارلار

یئنی چیخمیش،

 گوللریمی قیرارلار.

دولار گؤزوم،

یاغمور یاغار سئل آخار.

بیلیرسن می؟

گول باخجاسی اکمیشم.

هر بویالی نازلی چیچک سئچمیشم.

آرزوم بودور گونده سنه گؤندرم.

اؤرگیمده

درین بیر عشق بسله یم.

من عشقیمی،

هامیلارین اؤنونده

اوجا سسله هارایلاییب سؤیله دیم.

بیرجه سنی سئودیم

  سنه باغلی یام.

 

 

۱ نظر موافقین ۰ مخالفین ۰ ۰۳ ارديبهشت ۹۴ ، ۲۰:۰۳
باریش

داغلاریندا داشیندا

داملاریندا باغیندا

سسی گلیر قوشومون

اوخویور یوواسیندا

 

آی نه گؤزه ل اوخویور

یوواسینی توخویور

ارکگینه دیشی سی

قاش گؤز ائدیر اوینویور

 

بو قوشلارین آوازی

آغاشلاردا بو یازی

روحیما سیغال وئریر

چالاندا آشیق سازی

 

سئومه ر م من آرازی

چالدی آیریلیق سازی

یاریم اویاندا قالمیش

کیمه دئییم بو رازی

 

۰ نظر موافقین ۰ مخالفین ۰ ۱۶ اسفند ۹۳ ، ۱۶:۳۰
باریش

منیمله اولساندا، منه اوزاقسان

سوسوزلوقدان یانام منه قوراقسان

اورگیمده دردقالانیب درداوسته

سنسه منه سؤز بزه ین قوناقسان 

دونیانین ان گؤزل گولو اولسامدا

کؤکومدن ائله ین ایتی اوراقسان

دویمادین سن اؤرگیمین قارقیشین

من هارایام سن توتولموش قولاقسان

(باریش)دردین سؤیله مه سین نئیله سین؟

یاتیبسان سن، من سانمیشام اویاقسان!

۰ نظر موافقین ۰ مخالفین ۰ ۲۴ بهمن ۹۳ ، ۱۳:۵۷
باریش

دوغا دوغانه اوخشامیر

گوزیمه دونیا تار گلیر

زیان ائدیب اکیزلرین

قیسیر قالان باهار گلیر

 

ساچین باشین یولوبدیلار

آغاشلارین قیریبدیلار

گؤر نه گونه سالیبدیلار

باغلاریندا نه بار گلیر!

 

اکینچی لر قان آغلاییر

ائوده کی حیوان آغلاییر

داغدا دا جیران قالماییر

های دوشوبدی کی قار گلیر

 

قار یاغیر آمما تئز کسیر

یاغیش یاغارسا سئل گلیر

بولوت گلیرسه تئز گئدیر

گول قورویوبدی خار گلیر

 

قیش گونونده یاز گورورم

هشترخانی قاز گؤریرم

زوماریمی آز گوریرم

پاپاغ باشیمه دار گلیر

 

میلیونلار ایلین دنیزین

قوروتموشوق چای دره سین

کسیبدیلر لاپ نفسین

بو ایش منه  لاپ عار گلیر

 ........

۰ نظر موافقین ۰ مخالفین ۰ ۲۰ بهمن ۹۳ ، ۲۱:۴۷
باریش

بیریارا دوشموش جانیما

ایرینی قاتیب قانیما

درمانینی وئرمه دیلر

اؤلوم یاراشمیر یاشیما

 

بیر ده ساغالسام یاشارام

هاوالانیب بیر اوچارام

قاناد آچیب بیر قوش کیمی

بو داغین اوستن آشارام

 

دره لردن بیر گئچرم

سرین سولاردان ایچرم

وطنیمین توپراغینی 

اؤز جانیم تک من سئو رم

باریش

93.7.10

۰ نظر موافقین ۰ مخالفین ۰ ۱۹ بهمن ۹۳ ، ۲۱:۴۹
باریش

تاختا قاباغیندا کیلاس ایچینده،

یازیردیم من اینگلیسی دیلینده،

تاختادا یازیلانلارا بیر باخدیم،

الیمده بیر قلم قورویوب قالدیم.

تاختانین بیریانی عرب دیلی ایدی،

او بیر یانی فارس دیلیله دولو ایدی.

"ضرب ضربا ضربوا" یازیبدی.

او بیر یاندا "رفتم، رفتی" دئییبدی.

منده آرتیریرام اینگلیسینی،

یازانماسسیز بوندا بئله غئیرینی.

بو تاختا دا اؤز دیلیمه بیر یئر یوخ.

بو دیلدن بیر سؤزجوک یازسام گولن چوخ.

بو نه ایشدی؟اوره گیمدن سس گلیر،

گؤزومه یاش دولور سسیم تیتره ییر.

گؤزل دیلیم سنه ندن گولورلر؟

سندن دئسم منه کتلی دئییرلر!

"لید"(lid)سوروشسام اولار "درپوش" دئییرلر!

"قاپاق" دئسم بیر جوک کیمی گولورلر!

"ماش روم"دئسم "قارچ" دئییب سئویرلر،

"گؤبه له یه " قاه قاه چکیب گولورلر!

چولده آتان قارچ دئییر؟ سوروشورام

ائوده آنان قاپاق دئمیر؟ آی بالام!

دئدی: آغا ائوله بورا فرق ائدیر!

ساوادسیزلار بو سؤزلری چوخ دئییر!

سؤزو منیم اؤره ییمی یاندیریب،

نیفرتیمی باعیثلارا قالدیریب.

دئدیم:اوغول "گؤز"دن "گؤزل" دوزه لدن،

"قو" دان "قولاق" "سانج"دان "سانجاق" تؤره لدن،

"دونبا" دان "دونبالان" "قارین"دان "قارداش"،

"یاشیل"لا  "یاش"،" قیزل " لا  "قیز" دی کؤکداش.

بیر سؤزوندن یوز سوجوگو یارادان،

هامیسی نین بهره سی وار آنلامدان.

سون اکلری مونجوق کیمی دوزوبلر،

معجیزه تک تورکو دیلی بیچیبلر.

بول سؤزوموز سوفره میزدن داشیبدی،

اولمایانلار اوندان بهره آلیبدی.

آپاریب اونلاری ازیب بوزوبلر،

آنلامسیز بیر سؤزجوکلری دوزوبلر.

یایلاغین آنلامی یایدان آلینمیش،

"یای" کؤکودور "لاق" اکی دیر قاریشمیش.

"ییلاق" دئییب منه ده پوز وئریرسن!

دوز سؤزومه منیم ایراد ائدیرسن!

بیلگی سیز اینسانلار آنلام بیلمزلر،

طوط کیمیی یانسیلاییب  دئیه رلر.

منیم آتام آنلاملی سؤز یازانمیش،

 ساوادینی اؤز دیلیندن قازانمیش.

سن آلدانما اؤز دیلینده یازگیلان!

جاهیل لیگین کؤکون بیر یول قازگیلان!

بیرساز گؤتور تورکو دیلی سؤیله سن!

دوداق بوزوب گولنلره دئینه سن!

منیم دیلیم اکمه لی دیر اکمه لی!

دوم دورو مین بولاغی وار ایشمه لی

عاشیقام بو دیلین سازلی سؤزونه،

باشقا دیل اوتورماز اونون یئرینه.

 

Lid=قاپاق

Mushroom=گؤبه لک

اک= فارسجا "وند"

سون اک= فارسجا "پسوند" سؤزودو

اکلمه‌لی دیللر:زبانهای التصاقی که قانون مندترین زبانها هستند که ریشه کلمه در آنها هیچوقت عوض نمی شود. زبان ترکی در بین زبانهای التصاقی است و در رده اول این نوع زبانها قرار دارد.
۰ نظر موافقین ۰ مخالفین ۰ ۲۰ دی ۹۳ ، ۱۴:۴۳
باریش

بیلمیرم بیر عاشیقم یا بیلمه ین بیر غافیلم

مست لر کویوندا دوشموش بی خبر بیرجاهیلم

 

سندن آیریلدیم نیگاریم گؤر نجه زار اولموشام

بؤیله بیر دیوانه اولماز چوخلاریندان عاقیلم

 

اؤزگه باغیندا نه لر وار سئومه دیم هم درمه دیم

یوردومون گول باخچاسیندا گول درن بیر سائیلم

 

بیر بیلن وارسا اگر دونیادا بیر تک سنسن او

سن گؤرورسن اهل عشقین مکتبینه ماییلم

 

باریشام دردیم داشیبدیر سینم اوسته سئل کیمی

دؤزموشم بو حالا بیر ده سن دئییبسن عادیلم

۱ نظر موافقین ۰ مخالفین ۰ ۱۳ دی ۹۳ ، ۲۰:۳۸
باریش