من بئله گؤرورم نادان چوخالیر
سؤز قانانین هر گون سایی آزالیر
آنلایان اودون تک اوجاقدا یانیر
آنلاماز آدامین کئفی سازالیر
جاوانلار اؤیره نین کئچمیشی دوزو
کئچمیشین بیلمه ین قانماز هئچ سؤزو
اؤزگه نی اوجادا گؤروبدور گؤزو
چیرکین یادی گؤزل گؤروب ناز آلیر
باشقالارین باشینی اوجا ائتدی
بئینی بوشو اؤزونه هوجا ائتدی
بوردا قادا گنجلری قوجا ائتدی
باشقا یئرده قیشین یئرین یاز آلیر
«باریش» دئییر قارانلیقدا دورمایین!
ایری یولدا شیرین جانی یورمایین!
دوغرو اولون یالان یووا قورمایین!
دوز عملین یئرین بوش بوش سؤز آلیر
درد بیزه قارداش هله لیک یار اولوب
گولمه لی یوخدور هامی بیمار اولوب
یوخدو بو درده هله درمانیمیز
بویله گئدرسه ایشیمیز زار اولوب
دیندیریسن هرکیمی چپ_چپ باخیر
سانکی بئله بیزار اولوب
مشدی قازانفر بئله دون سؤیله دی
گؤرون باهالیق بیزه چون دار اولوب
گاه آسیری گاه کسیری گاه دا
دای دئمیرم چوخ سؤزوموز عار اولوب
چوخلو یئمکلر بیزیم ائودن کۆسۆب
بو باشی بلالی یئنه خوار اولوب
یاخجالی آچسام گؤرورم آی جانیم
اتله بامادور ایکیسی یار اولوب
نامه یازیبلار قاچیریق بیز گئدک
ینی بو ائوده هاوالار قار اولوب
بیزده لاواش گؤنده گیلئیلیک ائدیر
ات دوگو دوولتلیده آنبار اولوب
چوخ داریخیب ایسته ییری لاپ قاچا
اتله دۆگۆ ایله دئیه سن یار اولوب
یوخدو باریش‌دان بونا بیر منفعت
جیبلری داییم بوش و نادار اولوب
