آغزیما قاخ قویدولار آللاه قولو!

آغزیما قاخ قویدولار آللاه قولو!

آللاه قولو عمی ایله گول بادام خالا کئچمیشین خوش باخت ار آروادلاریندان ایدیلر. یوخسول اولماقلارینا باخمایاراق ائولرینده شادلیق شنلیک و خوشدیللیک وارایدی. گول بادام خالانین شیرین شیرین ناغیللاری، شعرلری، سؤزلری کند اوشاقلارینین دیلینده آغزیندا ایدی. گونلرین بیر گونو بیر قیش گئجه سینده بو خوش باخت عایله گول بادام خاتینین ایستی  تندیرینین اوستونده قورولان کورسو سینین قیراغیندا یاتارکن ایکی اوغرو گئجه نین قارانلیغیندان فایدالاناراق آستا جا و  سس سیزجه اونلارین ائولرینه گیردیلر. اوغرولار بو یوخسول ائوین بوجاقلارین تاقجا لارین آختارارکن گول بادام خاتین آیاق سسی ویا خود بیر شیققیلتی سسینه یوخودان آییلیب  گؤز آچیب  اوغرولاری گؤرنده قیشقیریب های سالماق یئرینه فیکریندن یارارلاناراق  ایسته ییر بیر اوسلو یول تاپیب اوندان بیر آز آرالی یاتان آغیر یوخولو آللاه قولونو آییلتسین. گول بادام خالا هئچ آییق اولدوغون بیلدیرمه دن یاسدیغین اوسته باشین اویان بویان ائله یندن سونرا اوجا سسله خورولداماغا باشلامیشدیر بلکه بئله لیکله آللاه  قولو عمی نی آییلتسین. اوغرولار  گول بادام خالانین خورولداماسینین سسیندن ال آیاقلارین ایتیرمیشدیلر نیه کی هر آن آللاه قولو عایله سی یوخودان آییلیب و اونلاری یاخالایا بیلردیلر. اوغرولاردان بیری گول بادام خالانین خورولداماسین کسمک اوچون گول بادام خالانین یئر یئیینتی تورباسیندان بیر اریک قاخی گؤتوروب و گول بادام خالانین آچیق آغزینا آتمیشدیر. بو حالدا گول بادام خالا سانکی یوخودا ساییقلاییر کیمی اوجا سسله سؤیله ییر: آغزیما قاخ قویدولار آللاه قولو! آغزیما قاخ قویدولار آللاه قولو!" اوغرولار گؤرموشدولر ایش بیر آزدا کورلاندی و اونلاردان بیری تئزلیکله  قاخی گؤل بادام خالانین آغزیندان چیخارتمیشدیر. بونونلا بئله گول بادام خالانین ساییقلاماسی دایانمامیشدیر  و یئنه ده اوجا سسله سؤیله میشدیر:"ایسلاتمیشدیم چیخاردیلار آللاه قولو! ایسلاتمیشدیم چیخاردیلار آللاه قولو!" و بونو دؤنه  دؤنه  تیکرار ائله میشدیر. اوغرولار ایشی بوجور گؤردیکلرینه گؤره گؤتوردیکلریله بیرگه ائودن چیخماغا چالیشمیشدیلار آنجاق گول بادام خالانین فیکری فایدالی اولوب و آللاه قولو و عایله سی  یوخودان آییلیب و اوغرولاری گؤروب توتموشدولار. گول بادام خالا اوغرولارین یاخالانماسینایاردیم ائله یندن سونرا  قوشماسینین دالینی کسمه ییب و اوغرولارا بوجور سؤیله میشدی:

اوغرولارین اللرینی کسگیلن

اؤزگه مالین ساتدیلار آللاه قولو

بئله لیکله اوغرولار بیلمیشدیلر کی گول بادام خالاخورولدایاندادا ساییقلایاندادا اویاق ایمیش و بو یوللار ایله یاتانلاری آییلتماغا چالیشیرمیش.

30دی ماه 93   (باریش)

طهرات درسی

قلئچی مورتوض اورت باسدیر ماحالینین ان بؤیوک یازاری "شککیات و شرعیات" کیتابیندا یازیر کی بیرگون شیخ آغا افندی طهرات درسی وئریردی. جاببارلا غاففاردا یان یانا اوتوروب فیض یاب اولوردولار. جاببار بیر سؤزجوگو شیخ آقا جانابلارینین سؤوزلرینده باشا دوشموردو. او سؤز "مقعد" سؤزو ایدی. جاببار غاففاردان سوروشدو: غاففار! "مقعد" یانی نمنه؟ غاففار دئدی:مقعد یانی گؤتداااااا!  جاببار تعججوبله دئدی: باه آتونان شیخ آقا سن نه یامان آدام سان! هئچ من ایندی یه کیمی مقعد آدیندا گؤت ائشیتمه میشدیم!!

هدایتین عسکرلیک حیکایه سی

هیدایت سربازچیلیق واقتینا کیمی کتدن ائشیگه چیخمامیشدی. عسکرلیگه آدی چیخدیغینا گؤره هیدایتی کندین آداملاری ییغیلیب یولا سالمیشدیلار. اسکی دن سرباز گئده نی دوغرو دوزگون تؤرنله  یولا سالاردیلار. آنا باجی آغلاشاردیلار. دئمه لی هیدایت ده گؤزو یاشلی کتدن آیریلیب و شهره دوغرو یولا دوشموشدو. هیدایت  او چاغا کیمی کندین قالاقلاریندان و زیغ دیوارلی داملاردان سونرا بیرزاد گؤرمه میشدی. اوْنا گؤره شهر شولوقلوغون و یئنی زادلاری بیردن گؤردوگونه گؤره جاییب و ائله شهره آددیمین قویاندان دولاشیق دانیشماغا باشلامیشدی. ایشین ترسه سی  سربازلاری بؤلنده، اونو فارس بؤلگه سینه گؤندرمیشدیلر. بئش آلتی آی سونرا هیدایت ایزن آلیب تبریزده قوهوملارینین ائوینه گلمیشدی. قوهوملار گؤرموشدولر هیدایت داهی تورکجه یوخ فارسجا دانیشیر وتورک دانیشانلارا دا  سانکی تورکجه  دیلین هئچ بیلمه ینلر کیمی جاواب وئرمه ییر. قوهوملار  هیدایتین باشینا ییغیلمیشدیلار، اونلارین چوخو دا فارسجا بیلمه ییردیلر و هیدایت له ال قول ایشاره سی ایله  دانیشیردیلار. اونا بیر دیلمانج قوشموشدولار کی اونو  کتلرینه آپارسین. اوتوبوسدا هیدایت یاشیل بوغدا زمیلرین دیلمانجا گؤستریب و دئمیشدی:"اینا چی هستن؟" اورداکی لار اونا گولوب ودیلمانجا دئمیشدیلر: بو یازیق فارسلار بوغدا دا بیلمیرلر نه دی، گؤره سن بونلار چؤرک یئمیرلر؟!

سؤزون قیساسی هیدایت دیلمانجلا کنده یئتیشیرلر. های دوشور هیدایت سربازچیلیقدان گلیب. دوران دورماز هامی  هیدایتی گؤرمگه گئدیرلر. هیدایتین  قاباغینا بیر داوار کسیب و  اویناماق گولمکله اونو آپاریب یوخاری باشدا اوتورتموشدولار، دالیسینا دایاناجاق، بؤیرونه یاسدیق قویموشدولار. کندین بویوک باشی هدایته خوش گلدین دئییب و اونون کئفین سوروشموشدو. هیدایت اوز توتوب دیلمانجا ساری و فارسجا قیریلدادیر. کند آداملارب گؤرموشدولر دیلمانجلا هیدایت بیر بیرینه بیر سؤزلر دئدیلر. سوروشورلار: سورون ندی؟ دیلمانج دا جریانی تریفله ییر.   کندین کاتداسی دئمیشدی: سیز دؤزون! من بونو دیله گتیرمگی باجاریرام. کاتدا اونا ساتاشما آتماغا  باشلامیشدی .  کند اهلی گولوب باییلیردیلار  آنجاق هیدایت سانکی هئچ نه آنلامیردی و یالنیز تاماشا ائدیردی!

هیدایتین آناسی قویونون اتیندن  پیشیریب و اونون اؤنونه قویاندا، هیدایت آناسیندان سوروشموشدو:"مادر این چیه؟!" یازیق آنا دا آغلارکن دئمیشدی:هیدی بالا اچجییه!  سونرا دا دئمیشدی : بالام دیللی گئتدی، دیلسیز گلدی!!

هیدایت ایزن گونلرین بوتون فارسی دانیشمیشدی و دیلمانج اونون سؤزلرین چئویرمیشدی. ایزینلی گونلر قوتارمیشدی و او یئنه ده فارس بؤلگه سینه گئتمیشدی. آنجاق بو دؤنه عسکرلیگی قورتاریب قاییداندا گؤرموشدولر هیدایت تورک دانیشیر. آناسی سئوینیب دئمیشدی: آللاه نذریمی قبول ائله ییب، بالام بو دؤنه دیللی گلیبدیر!! 

ایساخان!

 اسکی چاغدا خان‌خانلیق  چاغیندا هله خاندان سووای اونون آتین ناللایانلار دا سئویردیلر کی اونلارین آدلارینین آخیرینا "خان"  یاپیشدیرسینلار و یازیق رعیتدن ده ایستردیلر کی اونلارین آدین دیله گتیرنده "خان" دئمه گی اونوتماسینلار!  بونلاردان بیری ده ایسا آدلی بیر کیشی ایدی کی ادعا ائدیردی کی او دا خان تؤره مه لریندن دیر. ایسا کیشینین مالی-واری یوْخ ایدی آنجاق خانلیق ادعاسینداندان دا واز کئچمیردی!

گۆنلرین بیر گۆنو سیجیللی ایداره سیندن گلیب، میللته سیجیللی وئرنده میللت سیرایا دوروب سیجیللی آلارکن اؤزون خان آدلاندیران ایسا دا کیملیک آلماق اۆچۆن اورا گئتمیشدی. ایکی اللرین دالیسیندا باغلاییب و سینه‌سین قاباغا وئریب سیرایا دورمادان کئچیب  کیملیک مامورونون  اؤنونده دورموشدو.  کیملیک مامورو اونا باخیب اوندان سوروشموشدو: آدین نه‌دی؟ ایسا کیشی چوخ غورورلو و اوجا سسله دئمیشدی: ایسا خان!

 کیملیک مامورو آدین یازارکن ایساخانا دئمیشدی: هه، ایته سوخان عمی!! دده‌نین آدی  ندی؟  بو سؤز اوردا اولانلاری چوخ گولدورموشدو و  ایساخان دا اوتانیب، سویو سوزولموش جاواب وئرمیشدی: اؤز آدیمی باییلتدین قالدی دده مین آدی!!