ایچیمده بیر اوت یانیر
توستوسو جانیمدادیر
بوغولدوم آللاه آمان
دامارلاریم قایناییر
ها سؤز گلیر دیلیمه
چاشیر گئدیر گؤزومه
بولاق اولور قاینییر
سوزور یاناقلاریمه
اوره گیم لاپ گؤینه ییر
سؤزلریمی گیزله دیر
هردن دولوب داشاندا
دیلیم دوداقیم اسیر
سؤزلرینی سعف دئییر
اوره گیم لاپ دیلله نیر
سینه مه تاپ پاپ چالیر
دیلیمه، اوتان دئییر;
اؤره ک باغیشلا منی
باغیشلامارام سنی
اوره گیم آغلار دئییر;
یاندیریسان سن منی!
منیم احوالی روحیه م سولونجا داغلار آغلارمیش
گؤزومدن یاش آخان گؤنلر بو چولده داشلار آغلارمیش
اؤزون بویوم بوکولدوکجه سنی گورمک محال اولموش
سویوم گئتمیش دوزوم قالمیش منه دورنالار آغلارمیش
نه لر چکدیم نه لر گؤردوم بیلن یوخدور بو چؤللرده
آلاگؤزلی گؤزل قیزلار منی اوخشارلار آغلارمیش
قوجاقیمدان اوشاقلاریم قاچیب مندن اوزاقلارا
ائشیتمیشه م منه باغلی او یئرده باغلار آغلارمیش
چکیب گئتمیش بولودلاردا سینه م اوسته یانیر کؤزلر
دوداغلاریم یومولدوقجا قیزارمیش نارلار آغلارمیش
باریش گلیب منی گؤرسه اونا چوخلو گیلئییم وار
اوتانجیندان منه باخماز دئیر دریالار آغلارمیش
- بو شعیر اورمو گولو دورومو باره ده یازیلدی.
تانرینین باغینا باخ، گؤر نه گولوستان یارادیب
منی عشقینده دیلنچی، سنی سولطان یارادیب
آه و زار ائیله‌مه چوخ صبر ائله بیر گون گله‌جک
عشقیمه لاییق اولان بیر دلی جئیران یارادیب
قاشینا گؤزلرینه درده سالان قامتینه
منی دونیادا گؤزل یار سنه قوربان یارادیب
ایسته سم آیری دوشَم سندن اورک قانا دؤنر
بو اورک قانیمیله عهدیله پیمان یارادیب
بال دوداقلارینا باخ آی کیمی پارلاق اوزونه
منه دونیادا عزیزیم سنی بیر جان یارادیب
سئومیشم من سنی عشقینله قومار اوینامیشام
من اودوزدوم بو قوماری سنی شیطان یارادیب
(باریش) ایله باریشیب رحم ائله یاندیرما منی
سنی بیر بویلو چینار تک منی افشان یارادیب
گل اوتور سن منه شعر منده سنه قصه دئییم
بیر اویاندان بیر بویاندان سنه یوز صفحه دئییم
سن منه گولمه لی دئه من سنه جرتدان ناغیلی
سحری آخشام ائده ک هر نمنه گلسه دئییم
باغلا بیر ایپ منیم اول ساققالیما توت الینه
چک اونو من باغیریم حاق سؤزونو ترسه دئییم
بوگون احوالیمی پوزما دئه گؤریم سن نجه سن؟
من کی آما ده یم ایندی سنه بیر نامه دئییم
یوز قلم کاغذین اوسته یازیلیب منده آلام
جیب ده یوخدور پولوم اما گئجه یاره نه دئییم؟
.........................
